TRATA CERTIFICADO RAI SELU KA LAE?

Dala barak ema halo pergunta, ATU HALO CERTIFICADO RAI NIAN NE’E SELU KA LAE? 

Bem

Nia resposta bele mos SIM, bele mos LAE

Hau esclarece iha ne’e

Tuir ita nia Leis sira kona-ba rai, iha tipos oi-oin ba sukat rai ka levantamento cadastral: Levantamento Cadastral SISTEMÁTICO no levantamento Cadastral ESPORÁDICO 

1). Levantamento cadastral sistemático katak: estado timorense liu husi Terras e Propriedades traça plano ida ba área pré-definida hodi halao levantamento cadastral ka sukat rai ho sistemático. 

Exemplo: governo decide dehan Suco x tenke halo levantamento cadastral sistemático durante fulan x nia laran. Significa katak cidadão hotu nebe hela iha suco refere nia rai sei sukat hotu. 

Durante processo ida ne,e, Cadastro sei halo Coleta, Análise no Tratamento de dados hodi elabora lista rua: 

a). Lista parcela sira nebe iha iha disputa ka problema, tanto problema baliza quanto problema titularidade, hodi submete ba iha gabinete ministro da justiça, tuir mai gabinete ministro sei encaminha ba iha Comissão de Terras hodi resolve tuir mecanismo Comissão nian. 

b). Lista parcela sira nebe laiha problema, sei submete ba iha gabinete ministro da justiça hodi halo homologação. 

Homologação refere sei publica iha Jornal da República e por fim sei devolve fali ba Cadastro hodi finaliza processo emissão título nain ba rai.

Cadastro produz certificado tahan rua: ida entrega ba declarantes no ida seluk haruka ba iha Notariado atu halo nia registro predial.

FIM

BA PROCESSO IDA NE’E GRATUITO KA LA SELU TAXA DE ADMINISTRAÇÃO 

2). Levantamento cadastral Esporádico katak: procedimento levantamento cadastral ka processo sukat rai efetuado baseia ba pedido husi ema particular ida ou grupo ida (bele mos husi instituição do Estado) nebe submete ba iha Direção-geral das terras e Propriedades hodi ba sukat ninia rai nebe localizado iha qualquer fatin ou município iha território nacional. 

BA PROCESSO IDA NE’E LAOS GRATUITO, IHA EMOLUMENTOS ka taxa de administração nebe ida-idak tenke selu ba estado, tuir tabela iha anexo.

Ou seja, se ita boot iha rai mais de 10 hectares, tenke selu  US$1000 dólares hodi hetan certificado rai nian, karik ita boot mak husu ba terras e Propriedades atu ba halo levantamento refere.

Tamba saida mak processo balun selu no processo balun la selu? 

Resposta simples

Tamba lei mak hateten

Mas hau esclarece iha ne’e

Levantamento esporádico iha nia taxa de administração tamba processo refere fora husi plano Ministério da Justiça liu husi Terras e propriedades. 

Plano oinsa ne? 

Sim 

Lei das terras prevê katak processo atribuição título ne gratuito, mas somente ba levantamento sistemático.

Exemplo husi levantamento sistemático gratuito nebe governo planeia hodi atribui título ba cidadão hotu mak projeto boot ida ho naran PROJETO DO SNC, nebe governo timorense halo contrato ho empresa balun hodi halao projeto refere, iha tinan 2014 até 2019. 

Mas nusa mak até agora sedauk iha certificado nain ba rai se projeto ne nia contrato remata ona? Ne’e questão ida nebe hau rasik laiha competência atu fó resposta. Mas Ita hotu nudar timoroan iha direito atu exige ba governo fó resposta ba caso ida ne’e tamba usa povo nia osan hodi financia projeto refere. 

Iha ne’e hau somente hakarak fó deit exemplo ba levantamento sistemático nebe hau menciona iha leten. 

Portanto, atu resumo deit katak, se ita boot hakarak hein levantamento nebe gratuito então HAJA PACIÊNCIA hodi hein plano governo nian, mas se urgente atu hetan certificado rai hodi faan, sosa, aluga, garantia ba crédito no seluk tan, então submete requerimento ba levantamento esporádico.

Um abraço 

obs: tabela refere iha erro ituan, portanto iha ona sugestão atu altera. karik iha ona versão atualizada hau atualiza fali iha ne